Esta semana o mundo do software libre estivo de estrea: a Axencia pola Modernización Tecnolóxica de Galicia (Amtega) renovou o portal Mancomun.gal para ofrecer unha nova imaxe e novos e mellores contidos no mundo do software libre e as novas tecnoloxías.
Esta renovación inclúe unha nova imaxe, a cal é moito máis gráfica e actual, mellorando o seu deseño tanto en accesibilidade para persoas con algunha discapacidade como o seu acceso a través doutros dispositivos como móbiles ou tablets, os cales poden ver agora perfectamente a nova web, xa que o deseño adáptase a todo tipo de pantallas.
A renovación non se basea unicamente na parte externa, xa que con esta nova vida, o portal Mancomun.gal pasa a ter moito máis contido relacionado co software libre: ao xa coñecido boletín mensual de software libre para a administración pública uniráselle un novo boletín para empresas, que explicará as noticias e novidades do mundo do software libre pero desde unha visión empresarial. Ademais, desde a portada pódese acceder agora aos últimos informes, así como novas entrevistas e casos de éxito e unha nova sección de contido audiovisual, onde poderemos ver pezas en vídeo e audio relacionadas co portal e o software libre.
A nova estética inclúe tamén unha simplificación da estrutura do portal. Agora a sección “Solucións TIC” inclúe as solucións tecnolóxicas de software libre categorizadas dirixidas tanto a empresas, administración como a cidadanía en xeral, entre as que se inclúen as solucións liberadas pola Xunta de Galicia no Repositorio de software libre ou Forxa de Mancomún.
Asemade, o espazo “Repositorio Documental” presenta en modo de categorías os principais documentos liberados no Repositorio Documental de Software Libre no wiki de mancomún para facilitar a súa localización e descarga. E a última nova sección, pero non menos importante, Comunidade, convértese nun directorio dos membros da comunidade: asociacións, grupos informais e entidades promotoras e difusoras do software e o hardware libre en Galicia.
Esta renovación entra dentro do Plan de Software Libre 2017, que conta con 110 accións. Tanto se vos gusta o mundo do software libre coma se non, convidámosvos a que botedes unha ollada a Mancomun.gal e que descubrades vós mesmos todo o que ofrece o novo portal.