A ciencia ficción sempre soñou con que os computadores sexan capaces de evolucionar de tal maneira que comecen a pensar por si mesmos aínda que os científicos vexan isto con moi poucas probabilidades. Aínda así, no campo da intelixencia artificial están a facerse moitos avances e Shelley é un deles, xa que é unha intelixencia artificial capaz de escribir historias de medo.
E é que cando se fala de intelixencia, unha das características principais que ten que existir é a capacidade de crear, e en Shelley parece que o conseguiron… ou case. E é que Shelley é unha intelixencia artificial creada no prestixioso Instituto Tecnolóxico de Masssachusetts (o MIT) e que é capaz de escribir historias de medo colaborativas en Twitter.
Que fai exactamente Shelley? Pois a través da tecnoloxía chamada deep learning (aprendizaxe automática por parte da máquina sen necesidade de interaccion humana), a intelixencia artificial analizou máis de 140.000 historias de medo e foi capaz de facer unha historia continuada e lóxica.
Como funciona exactamente Shelley? É complexo, pero desde o MIT utilizárona para contar a través de Twitter historias de medo cos seus seguidores. Shelley realizaba dous tweets co comezo da historia e logo daba a oportunidade aos seguidores de continuala. Unha vez feito, Shelley analizaba as respostas e elexía unha coa que continuar unha historia de maneira real e entendible.
Que un programa informático sexa capaz de aprender a crear historias pode dar algo de medo se pensamos nas posibles consecuencias, pero o certo é que é un avance máis que significativo. Pensemos senón en robots que poden aprender, e perfeccionar, eles sós a maneira de realizar unha operación de risco. Non soa tan mal non? Iso si, segundo os expertos do MIT, Shelley é só unha proba e está bastante lonxe de ser capaz de crear historias por si soa. Terminator vai tardar en chegar.