5 claves para xerar interacción en redes sociais

Na guía práctica da semana pasada indicabámosvos cales son os primeiros pasos que debedes dar en redes sociais. Xa tedes imaxe de marca, lista de temas, contidos creados, etc., e non conseguides interacción? Dámosvos 5 pistas.

• Público. É fundamental ter claro a quen nos diriximos. Cando creamos un anuncio en Facebook para promocionar a páxina ou unha publicación, por exemplo, paga a pena investir uns minutos para segmentar o público ao que nos diriximos, para definir ubicación e intereses dos nosos potenciais clientes. De que nos serven 10.000 seguidores de toda España se temos unha tenda que só vende en Vigo?
• Contidos útiles. Xa sei que vendes e a que prezo. Nas redes sociais quero información sobre os teus produtos, titoriais, un vídeo explicativo da montaxe ou o uso do produto, etc. A orixinalidade xera interacción e visibilidade.
• Contar historias. Non só vendemos este produto e ofrecemos estes servizos. Seguro que a empresa ten unha historia que contar e que podemos compartir moitas cousas sobre o sitio no que traballamos. Podemos presentar aos traballadores (como é o seu día a día na empresa) ou incluso convidar aos seguidores a que compartan as súas historias (relacionadas ca nosa marca) con nós.
• As emocións. Se conseguimos emocionar á nosa audiencia temos boa parte do camiño andado. Podemos conseguilo compartindo historias, recordos do pasado cos que se sintan identificados, etc.
• Social proof. Interacción que chama a interacción. É obvio pero se un contido funciona, se vemos que ten comentarios e que se comparte, é máis doado que o compartamos. Por iso paga a pena investir un pouco en promocionar un contido que nos interese en Facebook, por exemplo. Facer un anuncio cunha publicación consegue máis gústames e compartidos do habitual, chega a máis usuarios que poden compartila se lles parece interesante.