A Amtega acaba de publicar na súa canle de YouTube dúas novas vídeo experiencias do Centro Demostrador TIC, a serie que nos mostra como as novas tecnoloxías poden axudar á pequena e mediana empresa. Son pezas breves contadas en primeira persoa polos propios donos, xestores e directivos das empresas que nos explican como adaptaron a tecnoloxía ao seu negocio e que beneficios lles trouxo.
Nesta nova entrega da serie, podemos gozar das experiencias de dúas empresas de sectores moi diferenciados: “Veraleza”, unha empresa que se dedica á comercialización de flores e plantas a nivel maiorista e “Termaria Casa del Agua”, un centro termolúdico, fitness e talasoterapia da Coruña.
“Veraleza” e o éxito da presenza online
Tati Corbacho cóntanos neste episodio como implantaron a súa tenda online e a súa comunicación a través de Facebook, chegando a moitos máis profesionais grazas á comunicación directa que lle proporcionan.
“Termaria Casa del Agua” e a eficiencia enerxética
Claudio Orjales, director xerente de “Termaria Casa del Agua”, relata como foron capaces de reducir o seu consumo enerxético e as súas emisións de CO2 á atmosfera grazas á implantación dunha solución tecnolóxica de mellora de eficiencia enerxética.
O resto de episodios de “Novas Experiencias TIC” están dispoñibles na canle de YouTube da Amtega