Cando navegamos, sempre é unha boa suxestión fixarnos se as páxinas web que estamos a visitar son seguras ou non. Facelo é moi sinxelo, tan só temos que fixarnos se a web ten diante HTTPS no canto de HTTP. Se ten esa S adicional, normalmente significa que estamos a navegar nunha web segura que trata os nosos datos de maneira codificada.
En pos de buscar maior seguridade na rede, Google decidiu que a partir de xullo, o seu navegador Chrome vai marcar como páxinas non seguras todas aquelas que non utilicen o protocolo HTTPS na utilización dos datos dos que navegamos nelas.
Significa que esas páxinas non serán seguras? Si e non. Navegar con HTTPS sempre é recomendable, sobre todo se a navegación por esa páxina implica introdución de datos sensibles como contrasinais ou datos bancarios. Pero se non hai nada diso implicado, navegar a través de HTTP non ten que ser algo do todo inseguro, só indicará que se enviamos algún dato á web, estes datos non estarán codificados e poderán ser interceptados por calquera.
Así que se temos algunha páxina web é recomendable apurarnos a que a nosa páxina sexa compatible co protocolo HTTPS, xa que Chrome é un dos navegadores máis usados e que a nosa páxina sexa marcada por el como non segura pode facer un efecto negativo nos nosos visitantes.