Cando creamos unha nova empresa ou proxecto, unha das discusións máis animadas adoita aparecer á hora de escoller o nome. Como nos identificamos ante os nosos posibles clientes usuarios é clave, polo que a elección non pode ser algo que se fai dun día para outro.
Á hora de escoller este nome adoitamos valorar temas como a sonoridade, o significado ou se existen empresas con nomes similares, pero algo que se nos pode escapar é a presenza na internet do nome escollido. Para que isto non nos volva a pasar, existe Brandhunt, unha páxina web especialmente deseñada para axudarnos nesta materia.
Que podemos facer con Brandhunt? Pois como o seu nome indica (“caza de marcas” en inglés), BrandHunt permítenos comprobar o estado do futuro nome da nosa empresa ou proxecto na internet. O seu funcionamento non pode ser máis intuitivo: introducimos o nome e a páxina comproba tanto os principais dominios da internet con ese nome, como as contas en redes sociais, dicíndonos se están ocupados ou dispoñibles para o seu uso.
Como engadido, BrandHunt permítenos engadir diferentes prefixos ao nome que escollamos, por se o noso ideario acabou nunha marca demasiado común. Desta maneira, grazas a BrandHunt, poderemos valorar con datos na man e con total seguridade a elección do nome para a nosa empresa ou proxecto.