Xa vimos como crear un blog en Blogger e en WordPress. Antes de decidirvos por algunha destas dúas opcións preguntádevos se a plataforma que estades a buscar non é Tumblr. Hoxe repasamos os pasos que tendes que dar para crear un post en Tumblr. Na seguinte guía práctica atreverémonos a publicar algún post e resolveremos algunhas dúbidas importantes.
Crear o blog
Como case sempre, o primeir paso é introducir un enderezo de correo electrónico válido e un contrasinal. Tamén tendes que escoller un nome de usuario. Antes de empezar a traballar en Tumblr deberedes verificar o voso correo facendo clic na ligazón do correo que acaba de chegar á vosa bandexa de entrada. Como eles mesmos din, “só te separan 30 segundos de Tumblr”.
O panel de configuración
Buscade a roda dentada do escritorio ou empregade a URL tumblr.com/settings. Podedes cambiar a información de perfil, enlazar ás vosas contas de Facebook e Twitter (Tumblr é unha plataforma para crear microblogs sociais) e incluso obter un enderezo de correo para publicar a través do correo electrónico.
Un blog personalizable
Se optades por un blog en Tumblr, será sinxelo e moi visual. Pero podedes facer clic en personalizar e escoller un tema, cambiar nome ou descrición, axustar as cores do fondo e das ligazóns, etc.
Dentro dunha semana entraremos no blog e faremos a primeira publicación. Atoparédesvos cunha plataforma moi distinta pero sinxela e efectiva.