A maior parte das persoas que traballa con ordenadores pasa moitas horas diante do ordenador. E se á xornada laboral sumamos varias horas de ocio ou lecer no noso fogar, non é estraño acadar as dez horas diarias sentado fronte a un monitor.
Na guía práctica de hoxe ofrecémosche algúns consellos para que te coloques correctamente cando te sentes diante dun ordenador; axudarache a evitar dores ou males futuros.
Usa unha boa cadeira e séntate ben atrás
Se pasas moitas horas sentado diante do ordenador é aconsellable empregar unha cadeira ergonómica, cun respaldo que se adapte ao noso corpo. En todo caso, teñas a cadeira que teñas, séntate ben atrás e asegúrate de ter todo o lombo contra o respaldo.
Coloca o monitor por debaixo da liña dos ollos
Se mantés esta posición, asegurarás que os ombreiros e o lombo manteñan unha posición correcta durante máis tempo.
Ten conta do brillo do monitor
Ter un brillo moi alto pode facer moito dano á vista, sobre todo en períodos de exposición prolongados. Axusta o brillo do monitor ou emprega unhas gafas especiais para ordenador. A pantalla do ordenador, mellor con acabado mate (non brillante).
Distancia entre pantalla e usuario: un brazo
Esta medida axudarache a medir sempre o espazo que convén deixar entre o monitor e ti.
A posición dos pés
Fixos nunha superficie (non colgando) e as pernas sen cruzar. Se non podes apoiarte no chan, emprega un escabel ou similar.
Tes algún consello máis para mellorar a nosa posición diante do ordenador? Cóntanolo!