Agora que entrou o verán é o momento de que os rapaces e rapazas da casa aproveiten as vacacións para o lecer. Apostar pola programación entre os cativos e cativas é darlles a oportunidade de que poidan crear o seu propio contido, non so consumilo.
Neste espazo ofrecemos algúns xogos de ordenador para que poidan ir aprendendo, dende cativos, a programar.
Scratch
Scratch é unha aplicación do MIT completamente gratuíta que leva en funcionamento dende 2006. Pode funcionar dende o navegador, pero tamén ten versión offline instalable.
Está orientado a nenos de entre 8 e 16 anos, pero a partires dos seis anos xa é posible facer cousas interesantes.
O mellor é a súa comunidade de usuarios; comparte proxectos e experiencias, e enriquecen moito este entorno de programación orientada á creación de xogos e animacións para nenos.
CodeCombat
CodeCombat é un xogo multixogador en liña que axuda a aprender da maneira máis divertida posible. Para xogar necesitas crear unha conta, podes escoller entre máis de 110 clases dispoñibles para a subscrición gratuíta (tamén hai unha de pago).
A partir de 9 anos xa é moi aconsellable o xogo, e é apto tamén para adultos xa que non se necesita saber programar previamente.
A web está en inglés, pero hai versións en español incompletas grazas á tradución de xogadores en todo o mundo.
Code.org, a “hora do código”
É unha iniciativa que aposta por introducir a teoría da computación nas escolas. ‘Code’ (código) está dirixida a estudantes de Estados Unidos, aínda que dispón dalgúns contidos en castelán. No seu sitio web, un vistoso titorial gratuíto amosa a través dun xogo do estilo Angry Birds como se ensina “unha hora de código”.
Tes nenos ou nenas na casa? Pois ensínaos xa de pequenos. “O programar non ocupa lugar”.