Día 1 – Falando por un mundo mellor

PRESENTACIÓN

Este é un programa que pretende aumentar e perfeccionar o emprego oral do galego e inducir á reflexión persoal sobre a relación que cada persoa ten coa lingua galega e co resto dos idiomas que coñece.

Ao longo de 21 días, aquí ides atopar propostas diversas para vos achegardes ao galego e á súa cultura.

A maioría dos contidos que se vos ofrecerán son realizados polo alumnado e o profesorado de cada un dos doce centros de ensino participantesque desde Caldas de Reis (por partida dobre), Castro Caldelas, A Coruña, Melide, Monfero, Nigrán, Ribadeo, Santiago de Compostela, Vilanova de Arousa e Viveiro vos falarán dos ODS (Obxectivos de Desenvolvemento Sustentable) que serán o fío condutor desta edición que leva por título Falando por un mundo mellor.

Ao longo das próximas xornadas, vós seredes as e os protagonistas dos 21 días co galego e + 2023.

E SE A PRÓXIMA HEROÍNA OU HEROE ES TI?

Queremos inaugurar este ano o programa con dúas heroínas da nosa lingua, Esther Estévez e Paula Jorge Horta. Imos ver o que nos teñen que dicir.

CITAS

Ao longo destas tres semanas non esquezas as nosas citas diarias:

– Nesta páxina.

– Nas nosas redes sociais: Facebook, Instagram, TikTok e Twitter.

– Na Radio Galega, de luns a venres no programa Galicia por diante, despois do informativo as 13:00 horas.

– E tamén imos ter como cómplices á xente do Dígocho eu! para nos divertirmos mellorando a nosa lingua.

FALAMOS – REFLEXIÓN 1

Hoxe vas ter que realizar a túa primeira gravación de reflexión.
Para realizares estes audios gravarás na túa casa ao final do día en solitario; o que realmente importa é a túa sinceridade e capacidade de análise. Non necesitamos que nos contes o marabilloso que é o galego; ben o sabemos!
Agora escolle o conxunto de preguntas que respondan á túa situación segundo fales galego de forma cotiá (OPCIÓN A) ou non fales galego de forma cotiá (OPCIÓN B)

OPCIÓN A: Eu falo galego de forma cotiá.
Xenial! Es das persoas que gardan o tesouro centenario da nosa lingua.

1. Que usos fas ti habitualmente do galego?
2. Na túa familia fálase o galego? Inflúe a idade das persoas para falares máis ou menos o galego na túa familia?
3. Cres que é importante para o galego que as persoas que o falan, coma ti, participen en iniciativas deste tipo para axudar a que o galego medre?
4. Ademais de falares galego na túa vida cotiá, se tes a idade para usalas, tamén empregas o galego nas túas redes?
5. Que che parece a proposta dos 21 días co galego e +?
6. Agora establece tres retos concretos para axudarlles a outras persoas a que o falen coma ti (poden ser compañeiras e compañeiros, familiares, amigas e amigos…). Os teus retos ten que ser posibles e medibles.
7. Pensas que che será moi doado ou moi difícil para ti conseguilo?
8. Desexas comentar algo máis?

OPCIÓN B: Eu non falo galego de forma cotiá.
Non te preocupes, é moi sinxelo mudar esa situación e sumarte á xente que fala en galego.

1. Que usos fas ti habitualmente do galego?
2. Na túa familia fálase galego? Inflúe a idade das persoas para falar máis ou menos galego na túa familia?
3. Que che parece a proposta dos 21 Días co Galego e +?
4. Veste capaz de chegar a falar 24 horas en galego desde o primeiro día?
5. Cres que o lograrás antes do último día?
6. Que reaccións percibiches entre o resto da túa clase ou na casa?
7. Que pasos deches xa hoxe para seguires a proposta?
8. Pensas ampliar progresivamente os usos ou tentas xa falar galego sempre?
9. En que ámbitos (escola, amizade, familia, lecer…) ou con que tipo de persoas cres/sabes que che custará máis?
10. Establece un reto posible e medible para ti neste programa. Pensas que che será moi doado ou moi difícil? Por que?

Esperamos que goces da experiencia dos 21 días co galego e + e que despois destas tres semanas aínda ames máis a nosa lingua e fique en ti para sempre.