Para o dispositivo do mes puxémonos a buscar entre os presentados no Mobile World Congress 2014, celebrado en Barcelona. Por enriba de todos, chamounos a atención o Yota 2, un smartphone de dúas pantallas. Unha delas “normal”, como a de calquera smartphone, pensada para ver vídeos e fotos; a outra con tinta electrónica, ideada para ler, recibir notificacións…, e aforrar batería.
Din que está sempre acendido; a pantalla de papel electrónico sempre está acendida para ler ou recibir notificacións (correo electrónico, redes sociais, etc.), sen a necesidade de activar o teléfono. E non é necesario apagala; incluso sen batería, a información máis recente desta pantalla manterase visible.
Lembrades cando comparabamos ebook e tablet? Yota 2 permite unha experiencia de lectura cómoda: teléfono intelixente e ebook nun só dispositivo. Ademais é imposible esquecerse de nada porque na pantalla de papel electrónico aparecerán tamén mensaxes, recordatorios marcados na axenda, información meteorolóxica… Todo o que nós seleccionemos.
Se lle damos a volta ao teléfono atoparémonos unha pantalla un pouquiño máis grande, de 5 pulgadas (a de lectura é de 4,7), e aplicacións interesantes como Sportscaster, de información deportiva, e Fitness Tracker, para monitorizar a actividade física.
O dispositivo xa está á venda en España pero non vos precipitedes; entre outras cousas, pode que vos atopedes cunha velocidade de resposta ás ordes que lle dades ao teléfono, menor á que estades acostumados.