Linkedin Ads.
Na lista de guías prácticas de Xente Dixital podedes atopar varios posts nos que escribimos sobre Linkedin. Rede social obrigatoria para calquera profesional que se move nunha contorna online e canle de comunicación cada vez máis importante para as empresas. No post de hoxe dámosvos 5 consellos para promocionar o voso negocio en Linkedin.
Perfís de empresa
O primeiro paso é obvio pero é importante subliñar a importancia de contar cunha páxina de empresa de Linkedin. É o sitio no que publicar información sobre o negocio en Linkedin, compartir información sobre o sector profesional ao que pertence ou estar en contacto con profesionais cos que colaborar, por exemplo. Os empregados dunha empresa deben conectar con ela en Linkedin e compartir información de interese, participar en grupos, etc.
Crea contido para Linkedin
Como en Facebook ou Twitter, é importante actualizar periodicamente a vosa páxina de empresa. Compartide novas publicadas no blog corporativo, novos servizos, novas de interese para o sector, etc. Compartir contido de calidade faravos cada vez máis visibles entre os profesionais do voso sector.
A túa empresa no teu perfil
Ademais das páxinas de empresa, os perfís persoais seguen a ser unha ferramenta moi importante. En Linkedin comportámonos como profesionais vinculados a unha marca. É importante que se vexa que facemos na empresa, en que proxectos participamos, que se poida acceder a outros perfís de redes sociais nas que participemos, etc.
Os grupos
Os grupos de Linkedin permítennos compartir novas, ofertas de emprego, abrir debates… É unha maneira de saber que ocorre no sector e de estar en contacto con outros profesionais. Cando nos suscribimos a un grupo chégannos avisos por correo electrónico da actividade recente.
Publicidade
En Xente Dixital pronto compartiremos información sobre as plataformas publicitarias das redes sociais máis importantes: Facebook, Twitter, Linkedin, etc. Antes de crear anuncios en Linkedin tedes que pensar se o voso público obxectivo está nesta rede social. Podedes segmentar por cargo e función laboral, por sector e tamaño da empresa, por grupos de Linkedin, etc. Págase por impresións (cando un usuario ve o anuncio) ou por clics nos anuncios.