65.000 entradas… que se di pronto. O dicionario de galego en liña Digalego xa está aberto ao público e de balde. Máis de 20 anos de traballo e investigación da editorial Ir Indo – quen fixo posible esta obra – que quedan accesibles a través do enderezo digalego.xunta.gal ou a través do Portal da Lingua Galega.
A Amtega e a Consellería de Cultura, Educación e Ordenación Universitaria poñen a disposición dos cidadáns esta ferramenta, que segue as regras ortográficas e morfolóxicas acordadas pola Real Academia Galega e o Instituto da Lingua Galega en xullo de 2003, e toma como base léxica o VOLGa.
Ademais da propia función de diccionario en liña, Digalego incorpora as seguintes funcionalidades
- Conxugación de verbos: xa non tes excusa para non saber como se conxuga o verbo andar. Sabías que en galego é irregular? Esta sección axúdache a saber como son todas as formas dos verbos recollidos no diccionario; tes un diccionario para iso
- Repertorio de formas incorrectas: esta sección responde á pregunta “está ben esta palabra?”. Recolle voces non admitidas en galego, como poden ser castelanismos, estranxeirismos, vulgarismos, hiperenxebrismos etc. que remiten á súa forma correcta.
- Apéndice Gramatical: o Digalego recolle un amplo apéndice gramatical que repasa dende o alfabeto galego ata as preposicións e os seus tipos.
- Equivalencias: o Digalego serve como ferramenta de difusión internacional, dado que ofrece equivalencias en portugués, castelán, inglés, francés, italiano, chinés e alemán.
Por certo, nesta entrada deixamos, a propósito, unha falta de ortografía. Animámosvos a que empreguedes o Digalego para que a detectedes e nola deixedes nun comentario… se a atopades! 😉