Da mesma maneira que para medir empregamos os metros para medir a distancia, ou os litros para a capacidade, empregamos os bytes para medir o tamaño dos arquivos (e a capacidade do disco) nos terminais informáticos.
A unidade de base empregada na informática é o Byte (non confundir con bit, un byte é un conxunto de 8 bits) e o seu símbolo é “B”. A partires de aí empregamos múltiplos maiores como unidades de medida
- 1kB (kilobyte) = 1204 bytes, é o que ocupa unha mensaxe de texto en WhatsApp, duns 100 caracteres.
- 1MB (megabyte) = 1024 kB, é o que consumes visitando Xente Dixital (ou outra web, aproximadamente).
- 1GB (gigabyte) = 1024 MB, é a cantidade habitual de datos que nos ofrecen as compañías móbiles mensualmente
- 1TB (terabyte) = 1024 GB, é a cantidade habitual que teñen os discos duros externos máis económicos.
- 1PB (petabyte) = 1024 TB, supón sumar 1024 discos duros coma o do punto anterior
- 1EB (exabyte) = 1024 PB
Xa, pero… como me serven a min estes datos no día a día?
O mellor para facerse unha idea do que significan estas medidas é establecer comparativas sinxelas que nos axuden a entender o espazo que temos en disco ou a cantidade de datos que nos queda no móbil.
Por exemplo con 1MB podes facer unha destas cousas que aparecen no cadro (so unha, non todas)
Fonte: entel.cl
De feito, aquí tes outra táboa comparativa para que vexas canto renden os datos que tes contratados no teu smartphone, empregando como referencias Skype, Youtube, redes sociais, música a través de internet ou correos electrónicos.
Fonte: http://www.mediatrends.es
Con esta sinxela táboa podemos facer as nosas propias contas: se temos un teléfono con 16GB de memoria, poderíamos almacenar algo máis de 600 cancións no teléfono (aínda que teríamos que ter en conta o tamaño de cada canción, e o espazo que realmente temos operativo no teléfono).
Agora somos nós os que che preguntamos: chégache o Gb que che dá a túa operadora de telefonía cada mes?
Tes interese en que fagamos fincapé nalgúns conceptos tecnolóxicos en particular? Fáinolo saber deixándonos un comentario!