O mundo dos navegadores levaba tempo en calma, sen grandes cambios e cun claro gañador na carreira: Google Chrome. O navegador do coñecido buscador é na actualidade o máis popular e un dos máis usados, tanto pola súa fiabilidade como pola súa compatibilidade cos servizos de Google.
Cando dicimos que levaba tempo en calma é porque xa non o está. Esta mesma semana lanzouse, cunha gran expectación, Firefox Quantum, a nova versión do coñecido navegador libre que prometía unha mellora incrible da velocidade e gran compatibilidade con todas tecnoloxías web. E o certo é todas as promesas cumpríronse.
Por que deberiamos probar Firefox Quantum
Por que debo tomarme a molestia de probar un novo navegador no meu computador? Pois porque pode mellorar moito a túa experiencia na rede. Por suposto, hai diferentes gustos no mundo da informática, pero se queres un navegador lixeiro, compatible e moi potente Firefox Quantum é a opción para ter en conta.
Firefox Quantum vén cun deseño moito máis moderno, coa integración en Pocket (un sistema para gardar artigos do que xa falamos aquí) e prometendo ser un 30% máis rápido que Chrome. Si, un 30%. Esa é a gran baza do navegador do raposo vermello: promete compatbilidade consumindo moitos menos recursos que o seu competidor, o cal foi acusado máis dun a vez de alimentarse demasiado da memoria RAM dos dispostivos.
Onde descargalo?
Firefox Quantum está dispoñible para Windows 10, macOS Sierra, Linux, Android Oreo e iOS 11. A compatibilidade entre todos os servizos web está case asegurada (salvo casos excepcionais), polo que a súa descarga, polo menos para probalo e ver como funciona, é máis que recomendable.