Non é doado definir o concepto delito informático. Estamos ante un novo tipo de delito, ou son delitos clásicos cometidos a través de novos medios? Do que non hai dúbida é de que cambia o procedemento de investigación e xorde o concepto de proba informática.
Temos á nosa disposición a páxina web do Grupo de Delitos Telemáticos da Garda Civil. Aquí podemos informarnos, informar e denunciar. Pero cales son os delitos informáticos?
A clasificación
No 2001 o Consello de Europa presentaba en Budapest o Convenio de Ciberdelincuencia, que dende entón xa foi asinado por varios países, entre eles España. O convenio recolle unha clasificación de 4 grupos distintos de delitos penais:
- Delitos contra a confidencialidade, a integridade e a dispoñibilidade de datos e sistemas informáticos: acceso ilícito a sistemas informáticos, interceptación ilícita de datos, interferencia no funcionamento dun sistema informático, etc.
- Delitos informáticos: Falsificación ou fraude mediante a introdución, alteración ou supresión de datos informáticos.
- Delitos relacionados co contido: Produción, oferta, difusión, transmisión…, en sistemas ou soportes informáticos de contidos, por exemplo, de pornografía infantil.
- Delitos relacionados con infraccións da propiedade intelectual e dereitos afíns.
Na mesma web do Grupo de Delitos Telemáticos da Garda Civil dannos algúns consellos interesantes para navegar de maneira segura:
- Actualizar regularmente o noso navegador.
- Empregar un navegador adecuado.
- Escoller contrasinais seguros e diferentes para cada servizo de Internet.
- Verificar cada pouco tempo os movementos da nosa conta bancaria.
- Empregar un antivirus con licenza e actualizado.
- Estar alerta, empreguemos o sistema operativo que empreguemos.
O mellor consello é o de empregar o sentido común, usar servizos electrónicos seguros e acceder a páxinas web fiables.