Esta semana quixemos achegarnos ao traballo de Turismo de Galicia na rede. Falamos con Xosé Manuel Merelles, responsable da Área de Comunicación, sobre o traballo que fan na páxina web e nas redes sociais, sobre o labor que desenvolven os community managers de Turismo de Galicia e sobre os retos que teñen por diante.
Turismo de Galicia caracterízase pola súa actividade na rede. Onde estades presentes?
Turismo de Galicia conta cunha nova páxina web que se puxo en servizo en setembro de 2012. A través desta web, editada en galego, castelán, inglés, alemán e francés, pódese acceder á práctica totalidade dos recursos turísticos de Galicia. Por outra parte, contamos cunha conta oficial nas principais redes sociais: Facebok, Twitter, Google+, Instagram, Youtube e un blog.
Cales son os principais beneficios do traballo que facedes en Internet?
A través da web, os potenciais turistas recadan información e poden contratar online servizos de aloxamento en turismo rural ou determinadas “experiencias” turísticas. Por medio do blog resaltamos determinados contidos e a través das redes sociais modulamos a oferta de acordo coas suxestións do público e cos nosos propios intereses promocionais.
Como funciona a rede de community managers de Turismo de Galicia?
Na actualidade a rede de community managers de Turismo de Galicia conta con seis persoas. Todas elas manexan contas nas principais redes sociais en galego, castelán e inglés. Ademais, hai unha persoa que emprega o alemán nas súas interaccións e outra o francés. Dende que funciona este equipo de community managers, Turismo de Galicia na rede acadou un alto grao de proactividade, xa que agora non só nos limitamos a atender a demanda de información, senón que “podemos escoitar” e dirixir esa información; buscamos aumentar a presenza do Turismo da Comunidade galega en foros, blogs, webs e redes sociais. Por outra parte, ese equipo encárgase tamén de amplificar as mensaxes que se emiten a través das contas oficiais de Turismo de Galicia.
O Entroido en Galicia está a arrancar e seguro que pronto comezaremos a recibir moita información relacionada a través das redes sociais de Turismo de Galicia e dos seus community managers; como se cobre un evento deste tipo?
Tendo en conta unha listaxe de eventos, o equipo de commnunity managers de Turismo de Galicia selecciona o que máis poida interesar ao público das redes, informa aos seus seguidores e inicia a conversa con eles. Achega contidos de texto, fotografías, vídeos e difúndeos de xeito xeral ou de maneira segmentada.
Que vos queda por facer en comunicación na rede? Cales son os próximos retos e obxectivos?
Neste momento estamos á procura de ampliar os nosos contidos gráficos e audiovisuais, de xeito que poidamos achegar imaxes e vídeos cada vez máis útiles para os nosos seguidores. Ampliar contidos e seguidores, é un dos retos que temos para este ano.