En Xente Dixital xa vos falamos do Proxecto Abalar que busca a integración efectiva das TIC nas aulas galegas. A Amtega, en colaboración coa Consellería de Cultura, Educación e Ordenación Universitaria, acaba de poñer en marcha AbalarMóbil, aplicación que lle permite aos pais seguir a actividade educativa dos seus fillos dende calquera lugar a través dos seus dispositivos móbiles, dunha maneira rápida e sinxela.
A app implántase nunha primeira fase en 11 centros educativos das 4 provincias galegas, o que beneficia a máis de 4.500 familias galegas. O alcance ampliarase paulatinamente ata beneficiar a preto de 400.000 familias.
AbalarMóbil leva aos móbiles e tablets os servizos que as familias teñen no EspazoAbalar. A principal vantaxe é que simplifica o acceso xa que só necesitamos un dispositivo con conexión a Internet; cando accedemos dende un ordenador necesitamos un certificado dixital ou o DNI electrónico.
Que permite AbalarMóbil? Os pais poderán consultar as cualificacións dos seus fillos, as faltas de asistencia e de conduta, os horarios e as materias, e os avisos ou notificacións dos profesores e do centro educativo.
A apliación está dispoñible de forma gratuíta para dispositivos Android e iOS.