Onte falabamos do lugar que ocupan os autónomos galegos na Sociedade da Información. A Amtega e o Colexio Profesional de Enxeñaría Informática de Galicia (CPEIG) acaban de presentar o Programa de Asesores TIC, para axudar a pequenas e medianas empresas a integrar as TIC no seu negocio.
O programa está destinado a negocios dos sectores da agroalimentación, do mar, da acuicultura e da construción, e a autónomos que teñan previsto implementar algunha solución TIC. Se estás interesado en participar, só tes que facer clic aquí. O prazo para inscribirse remata o 31 de outubro.
Necesidades e solucións TIC
As empresas seleccionadas recibirán un Plan Director TIC gratuíto, unha guía cos pasos a dar para a implementación de melloras tecnolóxicas. Os asesores TIC visitarán as empresas e analizarán procesos de negocio, dispositivos e ferramentas TIC empregados, etc. Trátase de detectar necesidades e buscar solucións tecnolóxicas.
Os encargados ou encargadas do asesoramento serán profesionais con formación en Enxeñaría Informática que axudarán a implementar solucións acordes a cada empresa, priorizando as solucións baseadas en software libre.
O Programa de Asesores TIC é unha ferramenta máis para axudar a que as TIC sexan a base do traballo dos autónomos, das pequenas e medianas empresas galegas.