Nos últimos días do ano saltaba á actualidade o peche definitivo de Google News España. En que consiste este servizo de Google? Por que pecha?
Se intentades entrar en Google News España atoparédesvos cunha páxina informativa na que Google nos explica que “tras a aprobación da reforma da Lei de Propiedade Intelectual tivemos que pechar o servizo de Google Noticias en España. A nova lexislación obriga a calquera publicación española a cobrar, queira ou non, a servizos como Google Noticias por amosar o máis mínimo fragmento das súas publicacións. Dado que Google Noticias é un servizo que non xera ingresos (non amosamos publicidade no sitio web), este novo enfoque resulta insostible”.
A LPI (Lei de Propiedade Intelectual) entraba en vigor o 1 de xaneiro pero o goberno aínda ten que desenvolver o regulamento. Hai que ter en conta que a norma terá carácter retroactivo.
Que é Google Noticias?
Google Noticias é un servizo de agregación de novas. Recopila titulares de máis de 50.000 fontes informativas de todo o mundo. Agrupa noticias similares e preséntaas dacordo aos intereses de cada lector. Google News España pecha en todo o mundo polo que ningún medio español aparecerá en ningunha das outras versións nacionais do servizo.
Cómpre sinalar que a LPI non afecta aos buscadores. Se facemos unha busca relacionada cun tema de actualidade, Google devolveranos aos resultados xerais entre os que aparecerá o módulo destacado “En las noticias”, con ligazóns de medios de comunicación españois.
Que consecuencias ten o peche? O peche de Google News España afecta, sobre todo, aos grandes medios xeralistas que eran os que aparecían máis veces e en máis categorías. A maior parte do tráfico procedente de Google que reciben os medios provén do buscador.
Fonte: eldiario.es.