O programa de Voluntariado Dixital da Xunta, impulsado pola Amtega e a Dirección Xeral de Xuventude e Voluntariado, vén de poñer en marcha o Plan de Formación 2015 co título “Design Thinking para a Innovación Social Dixital”. O obxectivo é ofrecer as ferramentas e metodoloxías máis avanzadas para xerar ideas, detectar necesidades de mercado e resolver problemas apostando pola innovación como un proceso colaborativo. Podedes informarvos sobre o programa na web voluntariadogalego.org.
O programa desenvolverase no Centro de Novas Tecnoloxías de Galicia (CNTG), en Santiago. Haberá dous bloques de dúas xornadas cada un: o 17 e o 18 de xuño de 10:00 a 20:00 e o 1 e 2 de xullo de 16:00 a 20:00. Se vos interesa inscribídevos xa aquí porque as prazas son limitadas.
Tomando como referencia os 10 proxectos seleccionados para CeMIT-Innova, traballarase en todas as fases da metodoloxía Desing Thinking: empatía, definición, ideación, prototipado e testeo.
Designthinking.gal
Que é o Desing Thinking? É unha disciplina que usa a sensibilidade e os métodos dos deseñadores para facer coincidir as necesidades das persoas co que é viable económica e tecnoloxicamente. O método está avalado e promovido polo Institute of Design da Universidade de Stanford.
Os responsables das xornadas serán os membros de designthinking.gal; espazo educativo formado por un equipo multidisciplinar que desenvolve a metodoloxía Design Thinking adaptada á nosa contorna.
Nesta actividade participarán Enrique Saavedra –enxeñeiro en Deseño– e Marcos Saavedra –deseñador de produto– co-fundadores do estudio Vermis Project e dos proxectos VermisLAB e Designthinking.gal, José Ramón Rodríguez –psicólogo empresarial con 27 anos de experiencia desenvolvendo plans de formación– e Chus Prol –filóloga e storyteller–.