Facede clic na imaxe para volver ver o evento
A semana pasada celebrábase a quinta edición de nethinking. Que é? Trátase dun “encontro anual entre algúns dos expertos comunicadores, bloggers, e artistas máis influíntes en internet, para debater e transmitir coñecemento sobre a contorna dixital, os novos medios de comunicación e os modelos de negocio en torno aos contidos dixitais na rede”. A que conclusións se chegou nesta última edición?
Falouse entre outras cousas da dependencia que xeran as novas tecnoloxías. Somos escravos das tecnoloxías? A primeira pregunta que había que responder era se as TIC melloran a calidade de vida ou son unha ferramenta de control e vixilancia. Preocupa a privacidade, compartir información persoal para o uso de redes sociais, aplicacións ou servizos de mensaxería instantánea.
Outro dos aspectos sobre os que cómpre reflexionar é a perda da atención e a produtividade. Conectámonos a través do ordenador e dos dispostivos móbiles para consultar o correo electrónico, as redes sociais, páxinas web que nos interesan, etc. Servizos que “requiren” unha atención constante; se estamos un tempo desconectados sufrimos a sensación de que estamos a perdernos algo.
Escribir na rede
Nethinking 2015 contou ca participación de Joaquín Müller, director da Fundeu, que falou de linguaxe e internet e apuntou algúns aspectos importantes:
- A escritura para pantallas é unha adaptación do existente a unha nova contorna.
- A instantaneidade lévanos a unha oralización do discurso: uso de signos de exclamación e puntos suspensivos, das maiúsculas con afán expresivo, etc.
- O individuo pode convertirse en medio, en ocasións, cunha importante audiencia. Aumenta a importancia de cada usuario e iso ten implicacións na escrita.
Falouse da necesidade de usar unha linguaxe clara por parte de empresas e da Administración, o que non implica usar un discurso simplista. E fíxose referencia á escritura multimodal (texto, interactividade, vídeo, audio, etc.) que ten cada vez máis importancia, sobre todo, entre a xente nova.
Por último, mención aparte merecía o humor na rede e os límites no seu uso. Concluíuse que a fronteira entre o aceptable e o inaceptable atópase nos oídos de quen escoita. A reacción ante un comentario non é igual no mundo físico, onde inflúen a cortesía, a vergoña ou a distancia, que no mundo dixital, onde a resposta adoita producirse dun xeito máis belixerante e xeralmente de maneira masiva.
No evento tamén se falou de xornalismo e propaganda e de xornalismo profesional e xornalismo cidadán. Podedes ler as principais conclusións aquí. O mércores falarémosvos doutro dos temas principais da última edición de Nethinking: para que usamos as redes sociais? Para que as usades no traballo e na vosa vida persoal?