Mañá no CDTIC terá lugar unha xornada de co-creación para promover o diálogo entre os centros tecnolóxicos e as pemes do sector do transporte marítimo e da náutica, para impulsar novas ideas e solucións tecnolóxicas.
É a primeira xornada de co-creación dirixida ao sector do transporte marítimo e náutico que se desenvolve no marco do proxecto europeo STAMAR, liderado pola Xunta a través da Amtega. Conta coa particpación da Axencia Galega de Innovación (GAIN) e de 7 entidades de referencia no eido da transferencia tecnolóxica, a innovación e a economía marítima de Francia, Reino Unido, Irlanda e Portugal.
A cita será no Centro Demostrador TIC entre as 9:30 e as 14:00. Os interesados poden inscribirse no 981 552 059 ou a través do correo stamar-xornadas@xunta.es. O obxectivo é intercambiar ideas para mellorar a competitividade das empresas galegas.
Ese é tamén o obxectivo de STAMAR, iniciativa da que xa vos falamos en Xente Dixital que busca mellorar a competitividade e a capacidade de innovación das pemes do sector marítimo do Espazo Atlántico. A idea é crear un centro transnacional demostrador das capacidades e tecnoloxías aplicables á industria marítima que favoreza os procesos de transferencia tecnolóxica.
STAMAR prioriza as tecnoloxías que favorecen o desenvolvemento económico e comercial, preservando a biodiversidade e coidando o desenvolvemento sostible.