Foto mbiebusch (Flickr)
A empresa S2 Grupo, especializada en seguridade da información, presentaba en maio deste ano un decálogo no que recollen os erros máis comúns de ciberseguridade das pequenas e medianas empresas. Seguro que non cometes ningún?
- Considerar que a información da empresa non lle interesa a ninguén. Todos somos obxectivos das botnets (robots informáticos) adicadas a enviar spam e atacar sistemas. Moitas pemes infravaloran ademais o valor que ten para a súa competencia a información que manexan: balances contables, tarifas, etc.
- Ciberseguridade, cuestión de informáticos? A seguridade informática é responsabilidade de todos os membros dunha empresa que deben xestionar incidencias e atender cuestións legais para evitar ameazas.
- Un antivirus é un firewall non son suficientes. A instalación de antivirus e firewall (sistema para a xestión de acceso autorizado, por exemplo, a redes privadas) conduce a unha falsa sensación de seguridade. Existen ameazas que requiren que adoptemos outro tipo de medidas.
- A seguridade é un proceso. Non un produto. Temos que ter os sistemas actualizados, implementar novos procesos e adaptarnos aos novos requerimentos legais. A idea é incorporar certas precaucións á rutina de traballo que non supoñen un gran esforzo e que evitan, por exemplo, o roubo de información persoal ou da empresa e o intercambio irresponsable de información de persoal e clientes.
- Confidencial. É fundamental garantir a protección da información da empresa asinando acordos de confidencialidade con provedores, clientes e traballadores.
- Contratos corporativos seguros. Protexes a información da túa empresa nos contratos con clientes e provedores? É habitual limitarse a follas de pedido que non coidan, entre outras cousas, o cumplimento da Ley Orgánica de Protección de Datos.
- Cumpres coa Ley Orgánica de Protección de Datos (LOPD)? Por responsabilidade e para evitar sancións, debemos coidar os datos que manexamos de empregados, clientes e provedores.
- Ameazas externas e internas. A maioría dos problemas xorden na propia empresa: un USB infectado, un empregado que reenvía involuntariamente un correo con información confidencial, etc. Problemas que se evitan implementando unha estratexia de seguridade compartida por todos os membros da organización.
- Servizos na rede. Cando ofrecemos servizos a través de Internet debemos multiplicar os esforzos de seguridade: instalar formularios que non sexan vulnerables, configurar correctamente os servidores, etc. Se non sabemos como facelo debemos chamar a atención sobre este tema á empresa encargada de crear e xestionar a nosa páxina web.
- Seguridade de servidores e redes. Moitas empresas gardan información importante en servidores que non contan coas medidas de seguridade necesarias porque, por exemplo, hai anos que non se accede a eles. Outras “permiten” acceder á rede corporativa a través dalgún punto de acceso wifi. Lembrades o primeiro punto do decálogo?