A semana vai de formación. Comezamos compartindo o calendario de actividades da CeMIT e o mércores entrevistamos a Cecilia Neri, axente TIC de Vigo para saber que servizos ofrece ou que obxectivos ten a Rede CeMIT para o 2015. Hoxe consultamos o calendario de actividades do Centro Demostrador TIC.
O próximo 4 de novembro na Aula CeMIT do Centro Cívico de Eirís, na Coruña, e retransmitido por streaming, desenvolverase un seminario de formación sobre community management. Está dirixido a calquera que queira poñer en marcha un proxecto de comercio electrónico. Introducirase a empresas e autónomos na nova contorna dixital, daráselles un esquema para desenvoler un plan de medios sociais e aprenderán a manexar e aproveitar as ferramentas 2.0.
Na Aula CeMIT de Chapela, en Redondela, o próximo 24 de novembro, impártese un curso sobre administración básica de Drupal. Os asistentes coñecerán os fundamentos de Drupal 7 e aprenderán a montar dende cero e a xestionar unha páxina web empregando este xestor de contidos. O 1 de decembro celebrarase no mesmo lugar a segunda parte do curso na que se profundizará no uso e configuración de Drupal con características avanzadas do sistema. As actividades están dirixidas a profesionais TIC, responsables da xestión web das empresas, autónomos, etc.
Para inscribirvos nas actividades só tendes que acceder ao voso espazo usuario dentro da páxina do CDTIC.
No CDTIC
Convén lembrar que na web do CDTIC tedes acceso, por exemplo, á Guía de solucións TIC en Software Libre. Podedes reservar as instalacións para levar a cabo un encontro TIC ou seminario de formación ou resolver as vosas dúbidas sobre as TIC a través do servizo Consultas TIC. Por último, no espazo CDTIC Virtual podedes analizar e probar solucións empresariais libres na nube. Agora mesmo está dispoñible Owncloud; coñecedes a aplicación?