A NASA, a axencia espacial estadounidense, é un referente en investigación tecnolóxica. A proba atopámola nas misións de demostración que buscan achegarse aos obxectivos da axencia para os próximos anos e aumentar a seguridade nas misións, e que están detrás dos avances tecnolóxicos que afectarán ao noso día a día dentro de non moito.
Antes de explicar ningún concepto relacionado coa enxeñaría aeroespacial, buscamos dous exemplos de investigacións con posibles aplicacións na nosa rutina.
‘Sammy the Second’ e o reloxo atómico
Paga a pena botar un ollo á páxina de Youtube da Nasa. Podemos atoparnos con vídeos coma este nos que fan un esforzo notable por explicarnos, dun xeito sinxelo, algúns dos seus programas. Neste caso crean a personaxe de “Sammy the Second” para explicarnos o papel do tempo na xeolocalización; fan un percorrido dende os primeiros mariñeiros que se guiaban polas estrelas, pasando polos modernos sistemas de posicionamento global (GPS), ata chegar ao DSAC (Deep Space Atomic Clock, ou reloxo atómico de espazo profundo). Este sistema permitirá aos astronautas calcular tempo e posición dende a propia nave.
Telerobótica
Hai anos que nos chaman a atención os vídeos de robots humanoides capaces de resolver tarefas propias da rutina dun ser humano. A telerobótica é unha das principais liñas de investigación nos centros da NASA nos Estados Unidos. O primeiro obxectivo é o de aumentar a seguridade nas súas misións pero, chegarán algún día a botarnos unha man no traballo ou coas tarefas do fogar? Este vídeo ten só 4 meses.
Facede un percorrido pola web da NASA e xogade a imaxinar un futuro cunhas cantas melloras tecnolóxicas.