Na nosa lista de guías prácticas faltábanos unha con 40 millóns de usuarios: Foursquare. Defínese como “aplicación gratuíta que che axuda a ti e aos teus amigos a tirar o máximo proveito do sitio onde estades”; aplicación porque ten sentido, sobre todo, no móbil ou na tablet. En Fousquare compartimos onde estamos e que facemos cos nosos amigos, e beneficiámonos de descontos e promocións exclusivos desta rede social. Repasamos as seccións máis importantes:
Amigos
Nesta pestana podemos ver onde fixeron check-in (a maneira de indicar que estamos nun sitio en Foursquare) os nosos amigos. Podemos visualizar os resultados por posición (os que están máis preto de nós) ou por data (os máis recentes). Pódense comentar os movementos dos nosos contactos.
Cantos máis check-in facemos máis badges (medallas) e alcaldías conseguimos, o que nos da dereito a descontos e promocións.
Explorar
Foursquare suxírenos restaurantes, cafeterías, locais nocturnos, tendas e opcións de entretemento. Podemos explorar por proximidade xeográfica, polo tipo de establecemento, ou ver suxerencias de lugares que ofrezan descontos e promocións.
Por facer
Sección interesante na que se recollen as tarefas pendentes e os lugares que descubrimos na aplicación pero que aínda non visitamos.
O meu perfil
Nesta sección temos acceso á nosa actividade en Foursquare. Información dos check-in feitos e dos badges e alcaldías conseguidos. Podemos comparar a nosa actividade coa dos nosos contactos, atender as peticións de amizade pendentes, etc.
Non esquezas que…
… como en todas as redes sociais, convén preocuparse por que fai Foursquare coa nosa información persoal. Botádelle un ollo á política de privacidade.
Enlaces: