Myspace ten hoxe moi pouco que ver coa rede social inaugurada por Tom Anderson no 2003. No 2011 pasaba a mans da empresa Specific Media LCC e do cantante Justin Timberlake. Segue a ser unha rede social destinada a calquera que queira darse a coñecer no mundo da música pero, dende a última renovación, conta cun deseño moito máis visual e sinxelo. Vemos, paso a paso, como empregar o novo Myspace.
- Rexistrarse. Podemos rexistrarnos de 3 maneiras distintas: cos datos da conta de Facebook, cos da conta de Twitter, ou co noso nome de usuario e contrasinal de sempre, se aínda o lembramos. O primeiro paso é indicar se somos músicos, actores, bailaríns, cómicos, etc.
- Perfil. Dentro do perfil destaca unha foto de portada que ocupa toda a páxina. Á esquerda da portada hai un espazo reservado para a foto de perfil e enlaces ás distintas seccións de Myspace. Á dereita podemos ver a biografía, parecida á de Twitter. Chama a atención que a navegación, ao contrario que en Facebook e Twitter, é horizontal e non vertical; se nos desprazamos á dereita podemos ver as últimas actualizacións dos usuarios cos que estamos conectados.
- Conectar. Para conectar con alguén que nos interese chega con buscalo e facer clic na icona das argolas. Así recibiremos as súas actualizacións. Se esa persoa conecta tamén con nós estaremos interconectados e poderemos compartir máis información: álbums, cancións, etc.
- Reproductor. Ten un espazo reservado na parte baixa da páxina de inicio. Podemos arrastrar aquí a música ou o vídeo que queremos reproducir ou crear unha lista de reprodución. Tamén podemos enviar contido interesante nunha mensaxe a algún dos nosos contactos.
- Publicacións. Podemos compartir cos nosos contactos unha mensaxe, unha foto ou un vídeo. Ademais, Myspace danos a posibilidade de compartir a publicación nas páxinas de Facebook e Twitter.
Non esquezas que…
… en Myspace, ademais do deseño, cambiou a política de privacidade. Botádelle un ollo para saber que fan coa información que compartides nesta rede social.