O CDTIC vén de lanzar aplicación para ios e android. Agora podes, sen saír do teu smartphone, consultar as actividades, inscribirte nelas e seguilas por streaming.
Entre as principais opcións que se poden realizar dende a aplicación destacamos tres:
Inscribirse nas actividades
A partires de agora non terás que entrar na web dende un ordenador cando vexas unha actividade que che interesa. Viches unha que che gusta dende a aplicación? Pois podes inscribirte directamente. E tamén podes xestionar as inscricións no caso de que, por calquera motivo, tiveses que anular a túa praza no seminario.
Visualizar en streaming
Podes seguir as actividades que se celebren dende o teu teléfono. A reprodución de eventos en streaming non é cousa só das computadoras. En calquera lugar no que te movas, sempre que teñas acceso á rede de datos (mellor, wifi!) do teu terminal, poderás seguir os seminarios do CDTIC, que se retransmitan vía streaming.
Agregar eventos ao calendario
Desta maneira non esquecerás nunca o evento. Ademais de consultar a axenda de actividades, a novidosa integración co calendario permite engadir eventos ao teu propio calendario persoal. Así, o teléfono poderá avisarte dos seminarios nos que estás inscrito e que están a puntiño de comezar.
Novidades na web
A web tamén foi redeseñada. Agora, o deseño adáptase aos diferentes soportes, ben sexan ordenadores, tabletas ou teléfonos móbiles, e ofrece novas sección do CDTIC para poder visualizar os seminarios en diferiido ou as impresións de directivos e responsables de empresas sobre a súa experiencia coa tecnoloxía.
O MapaTIC.gal mellora moito a súa experiencia de uso, e atopar unha solución TIC adaptada ás túas necesidades nunca foi tan sinxelo
Descarga a app do CDTIC para iOs ou Android e sácalle partido dende o teu teléfono móbil