Seguro que xa escoitastes falar do smartwatch ou reloxo intelixente. Por agora funcionan como complemento do smartphone pero existen diferencias notables entre fabricantes. Detémonos en dous dos dispositivos dispoñibles, o Sony Smartwatch 2 e o Samsung Galaxy Gear, á espera de coñecer as novidades prometidas por Samsung, Sony ou Apple para 2014.
Sony Smartwatch 2
No Sony Smartwatch 2 podemos ver as SMS e as mensaxes de Facebook ou Twitter, pero non podemos respondelas. Tamén podemos consultar a previsión do tempo ou a localización GPS. Para acceder a correos e notificacións, o reloxo non se pode alonxar do teléfono máis de 50 metros.
Podemos instalar aplicacións no reloxo a través do smartphone. Lembrades cando vos falamos de Runtastic? É a app perfecta para os que saiades a correr; agora é moito máis sinxelo consultar distancia recorrida ou duración da carreira.
Recoméndase agardar aos modelos que se van presentar este ano pero por se estades interesados, o prezo hoxe é de 189 €.
Samsung Galaxy Gear
Imaxinades chamar a alguén cunha orde de voz dictada ao voso reloxo? Co Samsung Galaxy Gear pode facerse. Tamén poden consultarse as SMS e as mensaxes das redes sociais. E aínda que non é moi práctico, permite facer fotos e vídeos.
Non convén alonxarse máis de 15 metros do smartphone ou da tableta para acceder ás aplicacións que funcionan coa conexión de datos do teléfono. Ademais, o Galaxy Gear só é compatible con algúns teléfonos e tablets Samsung de última xeración. O prezo, ao redor dos 300 €.
Pingback: O dispositivo do mes | Apple Watch - Xente Dixital