Xa temos o Plan de acción software libre 2014, elaborado pola Axencia para a Modernización Tecnolóxica de Galicia (Amtega). Durante o mes de xuño contarémosvos as actuacións que se desenvolverán durante este ano para incrementar o uso e o coñecemento do software libre por parte da sociedade, do sector empresarial e da administración.
En canto ao sector empresarial, manterase a oferta de demostracións e formación e o asesoramento particularizado ás pemes, e porase en marcha o Centro Demostrador TIC Virtual; as pemes galegas poderán probar o funcionamento de solucións libres a través da web do CDTIC.
A formación será de novo un dos eixos fundamentais de actuación do plan. Formación á cidadanía a través da rede CeMIT, do Programa de Voluntariado Dixital, das Asociacións galegas de usuarios de software libre (AGUSL), de AGASOL ou do Colexio Profesional de Enxeñeiros de Informática de Galicia.
Ademais ofrecerase formación no ámbito universitario a través da Oficina de Software Libre do CIXUG (Consorcio para o desenvolvemento de aplicacións para a Xestión Universitaria), no ámbito educativo no marco do Proxecto Abalar e aos empregados públicos a través da EGAP (Escola Galega de Administración Pública).
Por último, en canto á administración pública, durante o 2014 a Amtega dará os primeiros pasos na migración á ofimática libre do posto do empregado público, cun piloto de migración en 1.000 postos de traballo.