O CDTIC acolle mañá e o día 22 de setembro dúas sesións formativas sobre o xestor de contidos Drupal: “Desenvolvemento de portais web con Drupal: nivel básico” e “Desenvolvemento de portais web con Drupal: nivel avanzado”. Os horarios: de 10:00 a 14:00 e de 15:30 a 18:30 os dous días.
O primeiro día os asistentes coñecerán os fundamentos de Drupal e aprenderán a crear e xestionar unha web empregando este xestor de contidos. O día 22 o obxectivo é afondar na utilización e configuración de Drupal con características avanzadas do sistema, prestando atención á seguridade, rendemento e escalabilidade de portais web.
As sesións formativas están destinadas a profesionais TIC e aos responsables de xestionar webs de entidades do terceiro sector ou a empresas que queiran crear unha páxina web con Drupal. Os seminarios serán impartidos por Alberto Permuy, arquitecto especialista en Drupal.
Para participar só tedes que inscribirvos na web do CDTIC. A asistencia é de balde.
Solucións para o terceiro sector
Os seminarios forman parte dun ciclo formativo de solucións libres para o terceiro sector organizado pola Amtega en colaboración con EAPN Galicia (Rede Galega contra a Pobreza). Son 9 actividades que se impartirán nos próximos meses, pensadas para este sector da economía galega composto por entidades sen ánimo de lucro.