A Cidade da Cultura será o primeiro escenario mañá das xornadas “Rapaciñ@s. As tecnoloxías ben seguras” impulsadas polo Colexio Profesional de Enxeñaría en Informática de Galicia (CPEIG) e a Axencia para a Modernización Tenolóxica de Galicia (Amtega). Trátase dunha serie de charlas que se darán por toda Galicia e que comezan mañá na Cidade da Cultura.
Pais e docentes atoparán información e recursos de interese e as nenas e nenos participarán en obradoiros pensados para que se divirtan e aprendan, para que adquiran hábitos seguros para navegar na rede.
O programa con Enrique Dans e Rocío Ramos-Paul
A partir das 17:00 Enrique Dans encargarase da charla “Nenos, Rede e futuro: o perigo está en non estar”. A seguinte ponente será Rocío Ramos-Paul, autora do “Manual de Supernanny” que falará de “Educar na era dixital”. En paralelo celebraranse obradoiros para nenos de entre 8 e 14 anos sobre navegación segura, realidade aumentada, protección de datos, etc.
Rapaciñ@s xorde das xornadas “Navega con Rumbo polo Ciberespazo” impulsadas polo CPEIG. Á pregunta “que outros aspectos do campo das novas tecnoloxías cre que serían necesarios abordar en charlas no seu centro?”, resultaron as redes sociais e os menores, e as técnicas de control parental.
Para a xornada de mañá non é necesaria inscrición. As prazas para as conferencias e obradoiros cubriranse por orde de chegada. Animádesvos?