Esta semana estamos a falar sobre o uso que fan os menores de idade de Internet. En setembro deste ano, o Valedor do Pobo e a Consellería de Traballo presentaban o cómic Os perigos de Internet; o obxectivo é concienciar sobre o uso seguro de Internet e das redes sociais.
Guionizado por Gemma Sesar e ilustrado por Ramón Marcos, o cómic conta a historia dunha familia con fillos adolescentes que se enfronta ás ameazas que se derivan dun uso irresponsable da rede e da comunicación en redes sociais. Chámase a atención sobre o papel dos pais para que os rapaces poidan tirar proveito da rede e evitar riscos.
Editáronse 30.000 exemplares que se distribuíron en todos os centros de Educación Secundaria de Galicia. Tamén podedes descargar o cómic en formato PDF aquí.
A iniciativa xorde despois do estudo elaborado polo Valedor do Pobo no 2011, que concluía que o 53 % dos rapaces navegaba sen control dos seus pais.