A semana que vén falarémosvos de marca persoal. about.me é unha ferramenta moi interesante para construír a vosa presenza profesional na rede. Esquecede o currículo tal e como o coñeciades ata agora.
Non hai moito que contar porque é unha ferramenta moi sinxela. Hai dous campos principais: nome e biografía; aproveitade o texto para facer un resumo (non moi extenso) da vosa traxectoria profesional. Tende en conta os vosos obxectivos, que tipo de traballo ou cliente buscades. Debaixo do texto aparecen a vosa localización e algúns tags identificativos.
O máis interesante son as aplicacións, enlaces visibles aos vosos perfís de Instagram, Google +, Facebook…, e Linkedin; about.me é unha carta de presentación online que podedes vincular ao voso perfil profesional en Linkedin. Carta de presentación e currículo online en dous clics e actualizados en tempo real.
Podedes editar as tipografías e escoller a imaxe de fondo que prefirades; escollede entre as que vos ofrece a plataforma ou subide unha propia.
Vantaxes:
- Constrúe a túa presenza online. É a maneira perfecta de comezar ou de optimizar a túa presenza na rede. Pensache en cambiar o clásico PDF adxunto cando envías un currículo, por un enlace a about.me/oteunome?
- Un perfil público. Para acceder á vosa páxina en about.me chega con ter a URL. Non é necesario estar rexistrado. Se alguén vos busca vai atopar a vosa páxina en about.me; a plataforma fai o traballo de posicionamento por vós.
- Vende. Traballas como autónomo a través de internet? Esta é unha boa maneira de contar que fas e de presentarlle o teu traballo aos potenciais clientes; lembra que dende aquí poden ácceder á túa web ou ás túas páxinas de redes sociais.
- Todo sobre ti nunha soa páxina. Blog en WordPress ou Blogspot, páxina en Pinterest, perfil de Linkedin…; about.me permíteche centralizar toda a información de interese sobre ti nunha soa páxina web.
Non esquezas que…
… seguimos compartindo información persoal e profesional na rede. Coida que compartes e bótalle un ollo á política de privacidade para saber que información recollen e como a usan.