Xa mercastes todos os regalos de Nadal? Seguro que non. En Xente Dixital pareceunos unha boa idea que a web do mes fose agasallo.eu. A plataforma “compila, difunde, dá a coñecer e recomenda agasallos en galego”. O obxectivo é dar a coñecer creacións que usan a lingua galega; incentivar a regalar filmes, libros, camisolas, xogos… Non é unha tenda en liña pero indicaranvos onde podedes adquirir cada regalo.
Atoparedes as propostas organizadas en nove categorías: libros, música, audiovisual, xogos, tecnoloxía, téxtil, experiencias, alimentación e outros. Ademais poñen á nosa disposición un buscador de agasallos no que indicar prezo, idade e tipo de produto que buscamos.
Por outra banda, se creades, facedes ou elaborades produtos ou ofrecedes servizos en galego, podedes informarvos sobre como participar en Agasallo.
Por último, se a través dun centro de ensino, asociación, entidade, etc., queredes difundir en papel ou na rede propostas de regalos en galego, podedes crear o voso catálogo distribuíble.
Botádelle un ollo e seguro que atopades algunha idea de agasallo orixinal. Entre as suxestións que nos fan están, por exemplo, un libro de receitas en galego ou un dominio .gal.