Para informarse sobre o Entroido e outras festas, sobre calquera dos elementos da lista de recursos naturais e patrimoniais, para buscar experiencias ou preparar unha viaxe, cómpre visitar turgalicia.es.
Contén máis información da que podemos resumir nun post pero faremos unha ruta por algunhas das seccións máis importantes da web.
Galicia
Dentro da web de Turgalicia podemos enterarnos de varios segredos, escoller o evento máis interesante da axenda cultural ou acceder a información práctica: oficinas e centros de información turística, consulados, información de emerxencias e seguridade, etc. Tamén se poden descargar mapas e planos ou enterarse das últimas apps dispoñibles para enoturistas ou amantes do sendeirismo.
Destinos
Lugares destacados, rías e praias, espazos naturais, cidades, xeodestinos… É unha maneira de navegar por Turgalicia se sabemos que tipo de viaxe estamos a buscar. Que parques naturais coñecedes? Cales son os xeodestinos nos que se divide Galicia?
Experiencias
Á pregunta a onde imos de vacacións, seguro que poucos respondedes “coñecer algún dos bosques de Galicia”. Sorprenderavos a información que ides atopar. Tamén podedes percorrer Galicia paseando entre viñedos, coñecendo os manantiais galegos máis importantes, algúns “santuarios máxicos” ou, entre outras experiencias, facendo o Camiño de Santiago.
Recursos turísticos
Aquí atoparedes as respostas ás preguntas onde aloxarse, onde comer, que visitar, que facer, onde informarse, e recoller información sobre servizos turísticos e medios de transporte. Ademais, Turgalicia ofrécevos un localizador de recursos turísticos no que facer buscas por lugar (provincia, municipio e xeodestino) ou interés (onde aloxarse, onde comer, que visitar, onde informarse, etc.).
Comunicación
Cantas veces ao día vos atopades con algún dos community managers de Turismo de Galicia?; este mércores entrevistamos a Xosé Manuel Merelles, responsable da Área de Comunicación de Turgalicia, para coñecer mellor o seu traballo de comunicación na rede. Máis alá das redes sociais, na web tendes acceso a revistas, boletíns de novas, folletos, etc.