Cando necesitamos unha imaxe ou fotografía para ilustrar un artigo, unha actualización en redes sociais ou algún documento, a solución máis sinxela adoita ser utilizar o buscador de imaxes de Google.
Pero o famoso buscador non é o único sistema para buscar imaxes na rede. Hoxe traémosvos cinco alternativas á procura de imaxes de Google que vos poden ser de utilidade no voso día a día.
Yandex
O buscador máis utilizado en Rusia é unha boa alternativa a Google Imaxes. Desde Yandex podemos facer procuras por tamaño, cor, formato ( PNG, JPEG, GIF), orientación, por data ou mesmo buscar fondos de pantalla de certos termos.
O deseño da procura de imaxes de Yandex é máis atractivo que o de Google e ten máis funcionalidades adicionais como texto informativo ou a resolución da imaxe que estamos a buscar.
StartPage
Se che preocupa a privacidade, StatPage é o buscador de imaxes ideal xa que aseguran que non almacenan a túa dirección IP e teñen un cifrado SSL de alta puntuación. Está baseado en Google Imaxes, pero engade máis funcións que o buscador.
Picsearch
Ao entrar en Picsearch dámonos conta que o deseño non é o seu forte, pero teñen en carteira unha conta con máis de 3.000 millonesa de imaxes cunha procura avanzada que pode sernos de moita utilidade.
Bing
O buscador de Microsoft tamén incorpora a característica de atopar imaxes a través deles. O motor de Bing ofrece unha moi boa experiencia á hora de buscar imaxes, podendo gardar a imaxe cando a vemos, ver a súa orixe e mesmo ver imaxes relacionadas co elemento que estamos a ver.
TinEye
Queremos buscar unha imaxe similar a outra que temos? Pois TinEye é o noso candidato. Subindo calquera imaxe que teñamos no noso dispositivo, o buscador realizará unha procura inversa atopando instantáneas similares á que subimos.