Na guía práctica desta semana imos a falar das opcións que temos para tratar as suites de ofimática na nube: Google Docs, Office 365 e mesmo unha alternativa de software libre.
Google Docs (antes coñecido como Google Drive)
Ademais do espazo na nube que ofrece, conta cun procesador de texto, folla de cálculo, creador de presentacións, creador de formularios e incluso unha aplicación de debuxo vectorial.
A súa principal vantaxe competitiva é a posibilidade de edición colaborativa entre varios usuarios, de xeito que varias persoas poden estar traballando sobre o mesmo documento en tempo real.
Outra vantaxe é que podes exportar os arquivos no formato propietario de Microsoft Office.
E, o mellor de todo: é gratuíta!
Office 365, a aposta de Microsoft
Microsoft aposta pola nube levando a súa coñecida suite de ofimática ao navegador do teu computador. Por suposto, é compatible con todos os seus arquivos, e se empregas as súas aplicacións será moi sinxelo acostumarse á súa interface.
No entanto, o servizo non é de balde. Podes probalo un mes, pero ten un custe de 99 euros ao ano.
Con todo, hai unha maneira de empregar unha versión gratuíta, que é office online. Desta maneira podes empregar versións simplificadas de Microsoft Word, Excel, Powerpoint e OneNote, con varios Gb de almacenamento gratuíto empregando este último servizo.
Open365: Edición ofimática na nube baseada en software libre
Open365 combina tecnoloxías libres amplamente coñecidas como o entorno de escritorio KDE, o almacén de arquivos en cloud Seafile, a suite ofimática Libre Office, a plataforma de videoconferencias Jitsi e, finalmente, Docker como solución de automatización de despregue e distribución.
Polo momento, o acceso a Open365 está restrinxido a acceso beta, pero parece unha alternativa moi interesante!