Cando estamos a navegar por Internet poden ocorrer centos de cousas que fagan que perdamos o que estabamos a ver: un corte de enerxía, o bloqueo do computador ou simplemente unha mala combinación de teclas que pulsamos polas présas ou por accidente.
Ás veces é tan só unha lapela a que perdemos, pero se estamos a buscar información ou no medio de algo importante, é habitual ter moitas lapelas abertas e perder todo o traballo que tiñamos. Afortunadamente, hai maneiras de recuperar esas lapelas pechadas recentemente. Hoxe ensinámosche como facelo nos navegadores máis populares:
Recuperar lapelas en Google Chrome
No navegador de Google a recuperación das lapelas pódese facer de varias maneiras:
– Botón dereito sobre unha lapela e facer click en “Volver abrir lapela pechada”
– Coa combinación de teclas CTRL+SHIFT+T ou CMD+SHIFT+T se estamos en Mac
Recuperar lapelas en Firefox
Mozilla tamén ten a opción de recuperar lapelas. Pódese facer de diferentes maneiras:
– Facer click no símbolo + e darlle a “Desfacer o peche da lapela”
– Coa combinación de teclas CTRL+SHIFT+T ou CMD+SHIFT+T se estamos en Mac
Recuperar lapelas na internet Explorer e Edge
Microsoft tamén nos permite recuperar as lapelas pechadas nos seus dous navegadores. Na internet Explorer e Edge faise igual que en Google Chrome, con botón dereito na lapela aberta e facendo click en “Reabrir lapela pechada” e tamén coa combinación de teclas CTRL+SHIFT+T
Reabrir lapelas en Safari
O navegador de Apple permite abrir de novo a lapela pechada de maneira moi directa, con CMD+Z (teclado abreviado para desfacer) e facendo click no + da lapela para ver unha lista de lapelas pechadas con anterioridade.