A semana pasada sentáronse as bases para un proceso fundamental para a cultura galega: dixitalizar o patrimonio material e inmaterial de Galicia, e conservalo nun fondo que se albergaría no Gaiás.
O proxecto conta cun orzamento de 9,1 millóns de euros, impulsará o xurdimento de novos servizos e contidos para a industria e o turismo cultural, e aumentará o potencial do patrimonio para actividades de investigación.
Interior da Biblioteca de Galicia
A Memoria Dixital de Galicia aplicará a innovación tecnolóxica á xestión do patrimonio e da actividade cultural. Empregarase información xeográfica para xeorreferenciar os elementos do patrimonio cultural e inmaterial, así como técnicas de dixitalización en 2D e 3D, Big Data e solucións de mobilidade e realidade aumentada.
Os piares da “Memoria Dixital de Galicia”
Os piares sobre os que descansa a construción da Memoria Dixital de Galicia son catro:
- O Arquivo Electrónico Patrimonial, que ten como obxectivo a xestión do patrimonio documental galego. Estará dispoñible desde outubro a través dun portal web.
- Unha convocatoria de axudas para dixitalizar fondos do patrimonio cultural, que se fará pública nos vindeiros meses, e contará cun orzamento de 800.000 euros.
- A Biblioteca Dixital de Galicia (Galiciana), que conta xa con máis de 1,7 millóns de páxinas e 175.000 obxectos dixitalizados procedentes de arquivos, museos, bibliotecas e outras coleccións. Esta será, tamén, a canle de difusión do noso patrimonio cara ás redes transnacionais.
- As actuacións relativas á toponimia, como o portal da toponimia galega, que entrará en funcionamento en outubro e que irá incorporando progresivamente a microtoponimia.