Día 5 – Imos de museos!

A fin de semana, xa libres das ocupacións semanais, é un tempo ideal para o noso lecer, e entre as moitas ofertas que temos gustaríanos convidarvos a gozar da variedade museística que ofrece Galicia e, máis concretamente, das casas de escritoras e escritores. Para que poidades coñecelas un pouco máis, traémosvos o documental Casas de letras, museos da palabra.

En moitas ocasións, a palabra literaria vai da man da música. É o caso da máxima figura das nosas letras, Rosalía de Castro, musicada ao longo dos séculos en case todos os estilos musicais. Deixámosvos unha das moitas versións que existen do seu célebre poema “A xustiza pola man” pertencente ao libro Follas Novas (1880) realizada por SonDaRúa.

As casas-museo son tamén lugares vivos onde celebramos a cultura, como podedes ver nesta interpretación do poema “Has de cantar” de Rosalía de Castro, do seu libro Cantares Gallegos (1863) realizada por Uxia no festival Abride a Fiestra 2021 na celebración dos 50 anos da Casa de Rosalía.