DÍA 10 – A PONTE CAMIÑA POLO GALEGO

Arrancamos esta segunda semana do programa 21 Días co galego e + coas propostas do CEIP A Ponte de Lugo que nos veñen falar do Camiño de Santiago. Esperamos que vos guste!

FALAMOS

• Para educación infantil…

• Proposta didáctica para traballar os símbolos do camiño

  Partiremos do conto Bo camiño Valentiño da editorial Miau.

  – Buscaremos a simboloxía do camiño (cuncha de vieira, cabaza, frecha…) que aparece no conto.

  – Adiviña de que falo (concurso de mímica).

  – Destino Santiago de Compostela (Xincana).

  – Obradoiro de cunchas.

  – Decoración de mandalas do camiño.

  – Recuncho musical (diferentes instrumentos musicais tradicionais elaborados con materiais de refugallo).

  – Dramatización: “Camiñando a Compostela”.

  – Encontra o tesouro agochado (símbolos do camiño elaborados con distintos materiais).

  – Obradoiro de xogos tradicionais.

  – O selo do camiño (elaboramos con distintos materiais e deseñamos un logo).

• Para o alumnado de 1º ciclo de educación primaria…

• Proposta didáctica para traballar os diferentes tipos de camiños

  E agora que xa coñecedes algún dos camiños que levan a Santiago de Compostela, animádevos a trazalos con diferentes cores nun mapa fixándovos nas zonas polas que transcorren. Cales escolleriades para percorrer? Por que? Comentádeo na aula.

  A continuación, podedes elaborar o voso “Diario do peregrino” onde podedes incluír:

  – unha portada

  – unha páxina de presentación

  – unha explicación do que agardades da experiencia antes de iniciala

  – unha páxina diaria de etapa

  – imaxes e descrición de tesouros culturais que atoparedes no camiño

  – rexistro de animais, árbores ou outros elementos naturais que vos gustaría deixar reflectidos

  – as vosas anécdotas e momentos máis divertidos

  Tamén podedes deseñar cales serían os vosos preparativos para afrontar o Camiño.

  Bo camiño!

• Para o alumnado de 2º ciclo de educación primaria…

• Proposta didáctica para traballar as lendas

  Agora que xa visualizastes o noso vídeo sobre as lendas propoñémosvos a realización das seguintes actividades:

  – Lectura do conto “Lola e a raíña Lupa”, unha lenda na que a avoa de Lola lle conta a historia de como a tumba do Apóstolo Santiago chegou a onde está agora, é dicir, a Santiago de Compostela.

  – Conversa na aula sobre o que é unha lenda e as diferentes personaxes mitolóxicas que hai en Galicia.

  – Creación dunha personaxe mitolóxica galega propia (inédita) e posterior elaboración dunha lenda con ela/el coma protagonista.

• Para o alumnado de 3º ciclo de educación primaria…

• Proposta didáctica para traballar a historia do camiño

  “Un día na vida dunha/dun peregrina/o medieval”:

  Logo da lectura dun pequeno relato, crear un diario oral inventado onde o alumnado explique como sería un día no Camiño na Idade Media.

  Entrevista a unha/un peregrina/o actual:

  Preparación dun cuestionario e realización dunha entrevista, a poder ser real, para analizar motivacións e experiencias actuais. Tamén se pode facer figurada con dous alumnos onde un é o xornalista e outra a camiñante.

  Ruta escolar:

  Pequena ruta próxima ao colexio, simulando unha etapa curta. Observación da contorna, recollida de impresións para comentar oralmente o contido dun suposto “caderno de viaxe”.

  Liña do tempo:

  Realización colectiva dunha liña do tempo que amose a evolución das peregrinacións desde os primeiros séculos ata a actualidade de maneira que a cada alumna ou alumno lle toque explicar e engadir algún tipo de contido nela.

BAILAMOS E CANTAMOS

E agora imos todos e todas cantar e bailar….

Para rematar cantando deixámosvos o vídeo da canción “Camiño as estrelas” que fala do Camiño de Santiago.

A canción procede da canle de YouTube de Kókiti Música que é o contedor de música infantil creada polo mestre de música Iván Vale.

Deixámosvos aquí a letra da canción para que vós tamén poidades cantala.

Xa está todo preparado para o camiño,

meto as cousas que preciso con moito cariño.

Saco, bastón e unha cuncha na mochila

e a credencial que selan en cada vila.

Imos seguir as frechas que nos levan a Compostela.

Imos sentir as forzas que nos da o camiño…

Diversión, fatiga e boa compañía

é todo o que se precisa para ir pasando os días.

E xa, ao final, cando a meta está moi cerca

sinto que vou chegar ata a fin da terra.

Imos seguir as frechas que nos levan a Compostela.

Imos sentir as forzas que nos da o camiño…

Imos seguir as frechas que nos levan a Compostela.

Imos sentir as forzas que nos da o camiño… das estrelas.