Día 7 – Ecosistemas terrestres
Hoxe os nosos protagonistas son as alumnas e os alumnos do CEIP Ramón Otero Pedrayo de Viloira, no Barco de Valdeorras, que veñen falar con nós de ecosistemas terrestres. Este é un vídeo especial porque nel nos contan como viviron en primeira persoa o grave incendio que se produciu en xullo de 2022. Escoitade o que nos teñen que dicir e ides entender as verdadeiras dimensións deste problema.
(Preme na imaxe para ver o vídeo)
Falamos
- Hai que ver como pasa o tempo! Déstesvos conta de que xa levamos unha semana?
- Que vos pareceu o vídeo de hoxe?
- Gústavos gozar da natureza?
- Bañástesvos algunha vez nun río? Que preferides, a praia ou o río?
- E a montaña, visitades montañas coas vosas familias?
- Ocórresevos algo para evitar o problema dos incendios?
- Nos montes e montañas podemos atopar moitos animais. Imos facer entre todos unha listaxe de animais que poidamos atopar nestes lugares, a ver cantos coñecedes!
As paisaxes das montañas galegas son impresionantes, imos coñecer ese tesouro para darnos conta da importancia de conservalo. Mirade esta marabilla de vídeo do noso Courel.
(Preme na imaxe para ver o vídeo)
O alumnado do vídeo falaba de dúas graves consecuencias dos incendios, a destrución da paisaxe e tamén da fauna pois os animais que sobreviven teñen que fuxir.
Para que poidades ver eses animais dos montes galegos en liberdade, traémosvos un resumo do interesante traballo realizado ao longo dos anos 2021 e 2022 nas terras do Courel por alumnado de 3º da ESO do CPI Poeta Uxío Novoneyra.
(Preme na imaxe para ver o vídeo)
Cousas da lingua
Para os máis pequenos:
Sabemos que coñeces moitos animais pero… sabes cales son os animais co nome máis chistoso? Para saír de dúbidas mira o seguinte Dígocho eu!
(Preme na imaxe para ver o vídeo)
Para os outros niveis:
Sabemos que coñeces moitos animais pero… sabes como se din os sons que fan? Mira o seguinte Dígocho eu! e ponte ao día!
(Preme na imaxe para ver o vídeo)
Cantamos e bailamos
Hoxe imos cantar e bailar con Uxía, As Tanxugueiras e Faia que interpretan un dos poemas máis fermosos da lingua galega, “A fala” do poeta Manuel María. Esperamos que o cantedes e o bailedes moito!
(Preme na imaxe para ver o vídeo)
