DÍA 4 – TES UNHA CITA CO GALEGO!
Ola! Saúdos dende o CEIP Plurilingüe Irmáns Villar de Ourense. Desde este rincón de Galiza invitámosvos a amar a nosa fermosa lingua e utilizala non só durante os 21 días co galego, senón tamén na vosa vida diaria. Somos herdeiros e herdeiras dos antergos que a falaron, a conservaron e llela transmitiron ás futuras xeracións. Nós debemos ser agora coma eses antergos e facer que o galego viva para sempre.
Estamos felices de compartir convosco estas semanas e esperamos que vos divirta a nosa proposta.
Botaille un ollo ao noso vídeo e ao rematar… teredes unha cita!
FALAMOS
• Para os máis cativos…
O sofá máxico.
Cada un de vós tedes que sentar no “sofá máxico” e dicirlle ao resto da clase:
“ Chámome…, falo galego e quero moito a … porque…”
Así que dicide o voso nome, pensade ben nunha persoa á que queirades moito e dicide tamén por que a queredes tanto.
• Para o alumnado de 1º ciclo de educación primaria…
Palabras que namoran
A actividade consiste en facer un sorteo entre o alumnado, de xeito que a cada persoa lle toque outra persoa da súa aula e verbalice mensaxes positivas cara a ela.
• Para o alumnado de 2º e 3º ciclo de educación primaria…
Imaxina que tes unha cita co galego!
Que levarias á cita? Como a organizarías?
É unha pregunta de resposta libre, así que deixade voar a vosa imaxinación…
Dámosvos algunhas ideas: poderiades regalarlle un ramo con palabras en galego, ir a un restaurante a degustar unha comida típica, dar un paseo para ver as árbores autóctonas…
Que se vos ocorre a vós?
Lembra!
TES UNHA CITA CO GALEGO
E O GALEGO TEN UNHA CITA CONTIGO!:
BAILAMOS E CANTAMOS
Para rematar deixámosvos unha canción de Pablo Díaz que se chama “Queremos galego” e fala de amor e lingua. No vídeo podedes ver a coreografía que fixeron no CEIP Seara, animádesvos a cantar e bailar con eles?
Deixámosvos a letra da canción para que a poidades practicar.
Se clicades aquí podedes ver o retrouso con pictogramas.
QUEREMOS GALEGO
Queremos galego na terra e no ceo
queremos galego na beira do mar
queremos galego na terra e no ceo
queremos galego, xa!
O galego dos avós
ten que nos chegar a nós
se o coidamos e o falamos
ha durar outros mil anos.
Queremos galego na terra e no ceo
queremos galego na beira do mar
queremos galego na terra e no ceo
queremos galego, xa!
Máis galego, máis queremos,
canto máis o coñecemos,
ti se falas a nosa fala,
a nosa fala nunca cala.
Queremos galego na terra e no ceo
queremos galego na beira do mar
queremos galego na terra e no ceo
queremos galego, xa! (x 3)