O impulso á dixitalización das oficinas de rexistro é fundamental para acadar unha tramitación 100% electrónica. Estase a pilotar no Rexistro Xeral e continuará estendéndose progresivamente no último trimestre do ano aos rexistros xerais en Coruña, Ferrol, Lugo, Ourense, Pontevedra e Vigo. Aplicarase nas 342 oficinas de rexistro da administración local galega ao longo do 2016.
O obxectivo é conseguir a dixitalización das 533 oficinas que integran o Sistema Único de Rexistro no 2016. Unha vez completado o proceso, calquera documento que entre será dixitalizado e compulsado electronicamente e pasará a formar parte do expediente administrativo dixital.
Chave 365
O novo servizo Chave 365 poderá solicitarse a partir deste mes no Rexistro Xeral da Xunta e irase implantando progresivamente no resto das oficinas do Rexistro. Que nos vai permitir?
Chave 365 simplificará as xestións coa Administración. Facilitará a accesibilidade aos servizos de rexistro público online co uso de claves concertadas para acceder á sede electrónica. E dará resposta ás dificultades do uso de certificado electrónico.
Para empregar o sistema teremos que darnos de alta no servizo verificando a nosa identidade nas oficinas de rexistro habilitadas ou a través da sede electrónica. Despois recibiremos no móbil unha clave que empregaremos xunto co NIF. Serviranos para obter un código de sinatura dun só uso para resolver o trámite que queiramos.