O titular é algo longo de máis. É certo. Pero cómpre chamar a atención sobre o feito de que cada vez son máis as empresas que empregan as redes sociais para promocionar a súa imaxe e os seus produtos. É unha das conclusións do “Diagnóstico sobre a Sociedade da Información nas empresas de Galicia” correspondente ao 2013, publicado polo OSIMGA a principios de ano.
No 2013, un 25,6 % das empresas galegas de 10 empregados ou máis e o 26,4 % das microempresas empregaron algunha rede social: Facebook, Linkedin, Google +, etc. En Xente Dixital recomendámosvos a miúdo a comunicación en redes sociais para dar a coñecer o voso proxecto, para promocionar os produtos e servizos que ofrecedes.
As empresas do sector servizos son as que máis recorren ás redes sociais, fano un 29,4 % das microempresas e o 35,8 % das empresas de 10 ou máis traballadores; neste caso destacan as adicadas a actividades de aloxamento (70,3 %). As empresas menos activas son as do sector da construción; comunican por esta vía menos do 14 %.
Destaca que, por provincias, A Coruña e Pontevedra rexistraron un maior uso das redes sociais nas microempresas que nas grandes empresas: canto máis pequena é a empresa máis importante é a comunicación en medios sociais.
Máis redes sociais…, e máis comercio electrónico
Foto Infocux Technologies
Ademais dos datos de uso das redes sociais, publícanse por primeira vez datos relativos ao comercio electrónico extraídos da última enquisa do INE. Chama a atención que o 16,3 % de empresas de 10 traballadores ou máis con actividade en Galicia empregaron a rede para realizar ventas, superando en case 2 puntos a media estatal.