8 de cada 10 empresas galegas empregan software libre

8 de cada 10 empresas de Galicia con 10 ou máis empregados empregan o software libre; isto supón un incremento de máis de 10 puntos respecto ao ano anterior. O uso do software libre nas empresas sitúase ao mesmo nivel que nas empresas do sector TIC galego. Nas empresas de menos de 10 empregados, usan software libre algo máis da metade (6,9 puntos máis que o ano anterior).

Os datos están recollidos nos informes sobre o nivel de implantación do “Software Libre nas pequenas e medianas empresas de Galicia” e do “Software Libre nas empresas informáticas de Galicia”, elaborados polo Observatorio da Sociedade da Información e a Modernización de Galicia (OSIMGA), dependente da Amtega.

Que software empregamos

O maior incremento localízase nos servidores. Úsanse máis sistemas operativos libres nos servidores e menos sistemas operativos privativos. Por primeira vez, a porcentaxe de empresas TIC con servidores que usan sistemas operativos libres é superior á de empresas que empregan os privativos.

Os programas libres con maior implantación nas empresas galegas son os navegadores e as aplicacións ofimáticas; 80,2% e 58,2% respectivamente nas empresas de máis de 10 empregados, e 46,2% e 34,8% nas microempresas.

No caso das empresas informáticas, os aplicativos máis usados son os navegadores, as suites ofimáticas e os xestores de correo.

As empresas informáticas galegas, provedoras de solucións TIC

O 60,7% das empresas informáticas galegas que se adican á venda de produtos de software, ofrecen solucións libres (case 10 puntos máis que hai un ano). O produto libre máis ofrecido segue a ser o software para e-commerce. 8 de cada 10 empresas que venden produtos de comercio electrónico fano con software libre e o mesmo ocorre coas solucións de e-learning, cos xestores de contidos de páxinas web, etc.

As empresas informáticas galegas perciben o software libre como nicho de mercado que vai medrar no futuro. Un 10,7% das empresas que non ofrecen este tipo de produtos afirma que o fará antes de 2 anos.

Que motivos hai para non usar software libre?

O descoñecemento de solucións desenvolvidas con software libre, a falta de referencias deste tipo de produtos ou as dúbidas sobre a migración a software libre nas empresas de máis de 10 traballadores, son algúns dos motivos para non usar este tipo de tecnoloxía. No caso das empresas informáticas os motivos son a falta de provedores ou soporte, a falta de formación, a complexidade do cambio…

A Amtega, dentro do Plan de Acción de Software Libre, reforzará este ano as actuacións de fomento do software libre atendendo así ás demandas do sector empresarial. Continuarase coa oferta de demostracións e formación no CDTIC, elaborarase material formativo multimedia e pronto poderedes probar de maneira gratuíta dúas novas solucións que se van incorporar ao Centro Demostrador TIC Virtual.

Podedes consultar toda a información sobre os informes e o Plan de Acción de Software Libre na web do Osimga.

Fonte: osimga.org.