O verán é tempo de praia pero tamén de montaña e de rutas de sendeirismo. Coñecedes Sendegal? Dispoñible para Android e iOS, permite coñecer as rutas oficialmente homologadas de Galicia para o sendeirismo. Inclúe perfil topográfico, grao de dificultade e valoracións e comentarios útiles doutros usuarios.
Sendegal é unha aplicación de Turgalicia para promover e potenciar a actividade do sendeirismo como unha maneira de achegarse aos espazos naturais e ao patrimonio etnográfico e monumental de Galicia.
Para cada senda, a app dispón dos planos da ruta que poden descargarse ou gravarse previamente na memoria do teléfono para consultalos offline. Se activamos o servizo de ubicación do teléfono poderemos seguir a ruta sen dificultade.
Sendegal incorpora un modo de buscas por listado ou mapa que nos da información sobre: lonxitude da ruta, tempo estimado do percorrido, grao de dificultade, perfil topográfico, imaxes e outros datos de interese e valoracións ou comentarios doutros usuarios.
Por último, están dispoñibles os perfís propios da aplicación nas principais redes sociais especializadas en sendeirismo: Every Trail, Wikiloc e ikiMap. Aquí tamén podemos descargar directamente ao dispositivo móbil as rutas homologadas en Galicia.