Na guía práctica de hoxe repasamos algúns dos consellos que nos ofrece Google para tomarnos máis en serio a nosa seguridade en liña, un tema que debemos tomar moi en serio.
Velaquí algúns consellos que Google nos ofrece (en inglés) e sobre os que sinalamos os máis sinxelos de levar a cabo.
Navega en modo incógnito
Serve para que poidas navegar sen deixar rastro de cookies en moitos sitios web, e é unha opción realmente sinxela de executar. Se prememos “arquivo > nova xanela de incógnito” xa estamos navegando un chisco máis seguros.
Con este modo perdemos a personalización de contidos (e publicidade) que ofrecen moitas webs, pero é absolutamente recomendable cando empregas ordenadores compartidos ou públicos (coma unha biblioteca, por exemplo).
Bótalle unha ollada á túa configuración de Google
Podes facelo dende esta ligazón. Nesta sección de Google podes comprobar o contrasinal e acceso ás túas contas de Google, á información persoal e de privacidade e sobre todo, a unha revisión de seguridade e de privacidade.
A revisión de seguridade é aconsellable facela un par de veces ao ano, así que gardade esta ligazón.
Limpa o teu navegador
Damos por sentado que empregas Chrome (que tamén é propiedade de Google) así que a propia casa matriz ofrece unha ferramenta para limpalo e que vaia máis rápido e máis seguro. A utilidade de limpeza de Chrome podes descargala aquí.
Cambia os teus contrasinais con frecuencia
Polo menos un par de veces ao ano. Cambiar os contrasinais con frecuencia dificulta que poidan acceder á túa conta, aínda que este tema tratarémolo con calma noutra guía práctica, porque xa hai métodos de autenticación máis seguros que os contrasinais.
Levabas a cabo algún destes consellos? Agardamos que lle prestes atención á seguridade na rede, é unha cuestión de fonda importancia!